ភ្នំពេញ៖ រដ្ឋមន្ត្រីយុត្តិធម៌ លោក កើត រិទ្ធ បានផ្ញើសារជូនពរសម្តេចធម្មវិសុទ្ធវង្សា សៅ ទី ហេងសំរិន ក្នុងឱកាសអបអរខួបលើកទី១១២ ទិវាអន្តរជាតិនាតី ដោយបានលើកឡើងនូវការគោរព និងជូនពរដល់សម្ដេច សៅ ទី ហេងសំរិន ទទួលបាននូវសព្ទសាធុការពរជ័យ កាយពលមាំមួន បញ្ញាភ្លឺថ្លា សុខភាពល្អបរិបូរណ៍ និងជន្មាយុយឺនយូរ។

ក្នុងសារលិខិតជូនពរចុះថ្ងៃទី៦ ខែមីនា លោករដ្ឋមន្ត្រី កើត រិទ្ធ ព្រមទាំងភរិយា និងមន្ត្រីរាជការក្រសួងយុត្តិធម៌បានលើកឡើងថា៖ «យើងខ្ញុំទាំងអស់គ្នាសូមសម្ដែងនូវកតញ្ញុតាធម៌ដ៏ជ្រាលជ្រៅបំផុតជូន ចំពោះ សម្តេចធម្មវិសុទ្ធវង្សា ដែល សម្ដេច តែងតែលើកទឹកចិត្ត និងគាំទ្រ សម្ដេចអគ្គមហា-ពញាចក្រី ប្រធានរដ្ឋសភា ក្នុងការដឹកនាំស្ថាប័នរដ្ឋសភាដែលជាស្ថាប័ននីតិប្បញ្ញត្តិនៃព្រះរាជាណាចក្រកម្ពុជា ឱ្យសម្រេចបាននូវជោគជ័យដ៏ត្រចះត្រចង់ដើម្បីជាឧត្តមប្រយោជន៍របស់ជាតិ មាតុភូមិ និងប្រជាជនកម្ពុជា ព្រមទាំងបំពេញភារកិច្ចជាឧត្តមភរិយាដ៏ប្រពៃថ្លៃថ្លារបស់ សម្ដេចអគ្គមហាពញាចក្រី និងជាម្តាយ ជីដូន ជីទួត ជាទីគោរពស្រឡាញ់ប្រកបដោយសង្គហធម៌ដ៏ល្អប្រពៃ មានព្រហ្មវិហារធម៌ គុណធម៌ និងទឹកចិត្ត សណ្ដោសប្រណីដ៏ប្រសើរថ្លៃថ្លាដល់កូនចៅចៅទួតទាំងអស់គ្នា»។

ទិវាអន្តរជាតិនារី (៨ មីនា) គឺជាទិវាពិភពលោកដែលប្រារព្ធឡើងដើម្បីបង្កើននូវការយកចិត្តទុកដាក់លើស្ត្រីលើបញ្ហា សមភាពយេនឌ័រ ទប់ស្កាត់អំពើហិង្សា សិទ្ធិសង្គមសេដ្ឋកិច្ច វប្បធម៌ និងនយោបាយរបស់ស្ត្រី។ ទិវានេះត្រូវបានអង្គការសហប្រជាជាតិអនុម័តជាទិវាសាកលនៅក្នុងឆ្នាំ១៩៧៧៕